Utafiti Waonyesha AI Inapunguza Uwezo wa Akili zetu
Utafiti mpya kutoka Chuo Kikuu cha MIT umeibua wasiwasi mkubwa kuhusu athari za muda mrefu za kutegemea zana za Akili Bandia (AI) kama ChatGPT katika kazi za kila siku. Kwa kutumia vipimo vya ubongo kupitia EEG (electroencephalogram), watafiti walifuatilia wanafunzi 54 kwa kipindi cha miezi minne.
Matokeo yalionyesha kuwa wanafunzi waliotumia ChatGPT mara kwa mara kwa kazi za uandishi walionesha kupungua kwa shughuli za ubongo, uwezo wa kukumbuka, na fikra za kina ukilinganisha na wenzao waliotumia Google au ambao hawakutumia zana yoyote kabisa. Utafiti huu uliopewa jina la “Gharama za Kisaikolojia za Kutumia LLMs (Large Language Models)” ulionesha kuwa watumiaji wa AI si tu walitengeneza kazi zisizo na ubunifu wa kutosha, bali pia walishindwa kukumbuka walichoandika muda mfupi baada ya kumaliza kazi.
Ingawa ChatGPT hutoa urahisi na kasi, watafiti walionya kuwa faida hizo huambatana na kile walichokiita “uzembe wa kiakili.” Pia walibainisha hatari ya watumiaji kuingia katika “mabubujiko ya taarifa ya AI,” ambapo mtu hukubali majibu ya programu bila kuyachunguza au kuyahoji.
Cha kushangaza zaidi, hata walipotakiwa kufanya kazi bila msaada wa AI, watumiaji wa awali wa ChatGPT walionesha kiwango cha chini cha ushiriki wa kiakili. Kinyume chake, wale ambao hawakutumia AI mwanzoni na baadaye wakapewa fursa ya kuitumia, walionesha shughuli kubwa ya ubongo. Hili linathibitisha kuwa AI inafanya kazi vizuri zaidi kama msaidizi wa fikra za kibinadamu na si mbadala wake.
Soma zaidi kuhusu utafiti huu kupitia kiungo hiki:
https://www.media.mit.edu/publications/your-brain-on-chatgpt/
